“Gənc Ailələrin I Forumu” keçiriləcək
Azərbaycan Respublikasının Ailə, Qadın və Uşaq Problemləri üzrə Dövlət Komitəsi və “Addım” Gənclər Təşkilatının birgə təşkilatçılığı ilə 14 və 15 may tarixlərində “Gənc Ailələrin I Forumu” layihəsi həyata keçiriləcək.
100-dən çox şəxsin iştirakı nəzərdə tutulan forumda əsas məqsəd gənc ailələri müxtəlif sahələrlə bağlı (kişi-qadın münasibətləri, hüquq, uşaqların böyüdülməsi və tərbiyəsi, təhsil, sağlamlıq, psixoloji, büdcə planlaşdırması, gözəllik, dəb və s.) maarifləndirmək, həmçinin, peşəkar təlimçilər və ekspertlər tərəfindən müxtəlif növ interaktiv təlim və simulyasiyalar, habelə birgə müzakirələr, işçi qruplar formatında görüşlər və əyləncəli oyunlar təşkil etməkdir. Forum zamanı fəal, nümunəvi hesab edilən ailələr mükafatlandırılacaq.
Eyni zamanda KİV və sosial mediada mövzunun aktuallaşdırılmasına nail olmaq üçün müxtəlif piar kampaniyalar aparılacaq.
Məlumata görə, tədbirdə gənc ailə mövzusunda MirCəlal Paşayevin hekayəsinin motivləri əsasında çəkilən film ilk dəfə olaraq nümayiş olunacaq.
“Gənc Ailələrin I Forumu” nda iştirak etmək istəyən ailələr aşağıda göstərilmiş link vasitəsilə qeydiyyatdan keçə bilərlər.
