Zakir İbrahimov “AzerGold” QSC-də çalışan Daşkəsən sakinləri ilə görüşüb
“AzerGold” Qapalı Səhmdar Cəmiyyətinin (QSC) İdarə Heyətinin sədri Zakir İbrahimov Çovdar İnteqrəolunmuş Regional Emal Sahəsində (ÇİRES) çalışan Daşkəsən sakinləri və ətraf kəndlərdə yaşayan vətəndaşlarla görüşüb.
ÇİRES-də keçirilən görüş əməkdaşların iş şəraiti, onları qayğılandıran məsələlərin müzakirəsi, həmçinin Səhmdar Cəmiyyətin korporativ sosial məsuliyyət (KSM) fəaliyyəti çərçivəsində sosial ehtiyacların müəyyənləşdirilməsi və gələcəkdə icrası nəzərdə tutulan təşəbbüslərlə bağlı fikir mübadiləsinin aparılması məqsədi daşıyıb.
Tədbirdə çıxış edən İdarə Heyətinin sədri Z.İbrahimov “AzerGold” QSC-nin mütərəqqi beynəlxalq təcrübə və standartlar əsasında həyata keçirdiyi hasilat və istehsalat fəaliyyəti zamanı ətraf mühitin mühafizəsi, işçilərin sağlam və təhlükəsiz əmək şəraiti ilə təmin olunması sahəsində görülən işlərdən danışıb. O, təbii resurslardan səmərəli istifadə, dayanıqlı inkişaf konsepsiyasının tətbiqi və sosial məsuliyyətlilik prinsipləri əsasında fəaliyyətini təşkil edən “AzerGold” QSC tərəfindən yerli sakinlərlə iş, onların məşğulluğu, sosial-iqtisadi vəziyyətinin yaxşılaşdırılması, təhsil, səhiyyə xidmətlərinə əlçatanlığın artırılması, biomüxtəlifliyin qorunması, idmanın inkişafı və digər istiqamətlərdə sistemli tədbirlərin icra edildiyini bildirib.
Belə ki, Korporativ Sosial Məsuliyyət fəaliyyəti çərçivəsində Quşçu qəsəbə tam orta məktəbinin yeni modul tipli binasının inşası, Çovdar, Çaykənd kəndlərinə su xəttinin çəkilməsi və yeni bulağın istifadəyə verilməsi, Yuxarı Daşkəsən, həmçinin Mədənçi qəsəbələrinin su təminatının yaxşılaşdırılması, Daşkəsən şəhərində minifutbol, universal voleybol-basketbol meydançalarının yenidən qurulması, Gəncə şəhərində regional Autizm Mərkəzinin istifadəyə verilməsi, həmçinin yerli arıçılıq təsərrüfatının inkişafına göstərilən dəstək qeyd edilib. QSC-nin KSM Komitəsi tərəfindən hasilat bölgələrində yaşayan yerli icmalarla mütəmadi görüşlərin keçirildiyini, vətəndaşlar arasında vaxtaşırı sosial sorğuların təşkil edildiyini deyən İdarə Heyətinin sədri, həmçinin sakinlər tərəfindən ünvanlanan müraciətlərin diqqətlə araşdırıldığı, ölkə qanunvericiliyi və QSC-nin Sosial Təsir və Məsuliyyət üzrə Siyasəti çərçivəsində həlli istiqamətində müvafiq addımların atıldığını diqqətə çatdırıb.
Bildirilib ki, Cəmiyyətə daxil olan əksər vətəndaş müraciətləri Daşkəsən rayonun Çovdar kəndinin inzibati ərazisində yerləşən “Şadax” adlandırılan müvəqqəti yaşayış məskəni və Göygöl rayonunun Tülallar kəndində mədən layihələrinin icrası çərçivəsində torpaq sahələrinin alqı-satqısı və icarəsi ilə bağlıdır. Qeyd olunub ki, mədən layihələrinin icrası ilə bağlı təsdiq edilən Ətraf Mühitə Təsirlərin Qiymətləndirilməsi sənədi, eləcə də beynəlxalq məsləhətçi şirkətlər tərəfindən hazırlanan Təfərrüatlı Texniki-İqtisadi Əsaslandırma sənədinə uyğun olaraq məhz mədən və onun sanitar-mühafizə zonasında yerləşən fərdi yaşayış evləri və torpaq sahələri üzərində mülkiyyət və istifadə hüquqlarının əldə edilməsi istiqamətində müvafiq addımlar atılır. Daşınmaz əmlakların bazar dəyərinin müəyyən edilməsi məqsədilə cəlb edilmiş müstəqil qiymətləndiricinin apardığı təhlillərin nəticəsi olaraq prosesin vətəndaşların maraqları və qanunvericiliyin tələbələrinə uyğun həlli təmin edilir. Belə ki, Göygöl rayonunun Tülallar kəndində mədən və onun sanitar-mühafizə zonasının hüdudları xaricində yerləşən daşınmaz əmlakların alqı-satqısına zərurət olmadığından, həmçinin layihənin iqtisadi səmərəliliyinə təsir etdiyi üçün nəzərdə tutulmadığı qeyd olunub.
Çovdar kəndinin inzibati ərazisində yerləşən və el arasında “Şadax” adlandırılan yaşayış məskəninə gəlincə qeyd edilib ki, həmin ərazidə vaxtı ilə Kəlbəcər rayonundan məcburi köçkün düşmüş Yellicə kənd sakinləri müvəqqəti məskunlaşıb. Sözügedən ərazi emal sahəsinin hazırda inşası davam edən anbarından təqribən 500 metr aralıda yerləşir. Layihə ilə bağlı hazırlanmış, ictimai müzakirədən keçdikdən sonra 27 avqust 2021-ci ildə Ekologiya və Təbii Sərvətlər Nazirliyinin Dövlət Ekoloji Ekspertiza Agentliyi tərəfindən təsdiq edilmiş Ətraf Mühitə Təsirin Qiymətləndirilməsi sənədində sözügedən ərazidə müvəqqəti məskunlaşan əhaliyə təhlükənin olmadığı, lakin toz, səs, vibrasiya kimi mümkün risklərin olduğu müəyyən edilib. Ona görə də, “Şadax” ərazisində müvəqqəti məskunlaşmış məcburi köçkünlərin ərazidən köçürülmələri ilə bağlı məsələyə baxılıb, lakin yaşadığı evlərin mülkiyyət hüquqlarını müəyyən edən sənədlərinin mövcud olmaması faktı qanunvericilik üzrə köçürülmə məsələsində çətinlik yaradıb. Bununla belə, əlavə edilib ki, sakinlərin həmin ərazidən köçürülməsi məsələsi ilə bağlı Qaçqınların və Məcburi Köçkünlərin İşləri üzrə Dövlət Komitəsi, Daşkəsən Rayon İcra Hakimiyyəti və Kəlbəcər Rayon İcra Hakimiyyəti, Azərbaycan Respublikasının İqtisadiyyat Nazirliyi yanında Əmlak Məsələləri Dövlət Komitəsi, eləcə də digər aidiyyəti dövlət orqanlarına rəsmi məktublar göndərilib, mütəmadi olaraq danışıqlar aparılır.
Görüşdə, sakinlərin müraciətləri dinlənilib və qeydiyyata alınıb. İdarə Heyətinin sədri müraciətlərlə bağlı müvafiq addımların atılması, vətəndaşların qaldırdıqları məsələlərin araşdırılması və mövcud qanunvericilik çərçivəsində həll edilməsi ilə bağlı tapşırıq və tövsiyələrini verib. Görüş iştirakçıları qəbula görə İdarə Heyəti sədrinə təşəkkür edib, Daşkəsən rayonunda sosial-iqtisadi inkişaf, məşğulluğun artırılması, sosial rifah halının daha yaxşılaşdırılması istiqamətində dövlətimizin yürütdüyü siyasətə “AzerGold” QSC-nin verdiyi töhfələrin Daşkəsən sakinləri tərəfindən daim yüksək qiymətləndirildiyi diqqətə çatdırılıb.
