Son 5 ildə qeyri-neft-qaz sektoru real olaraq təxminən 26 faiz artıb
Azərbaycan iqtisadiyyatı mühüm inkişaf mərhələsinə qədəm qoyub. Son 5 ildə qeyri-neft-qaz sektoru real olaraq təxminən 26 faiz, qeyri-neft-qaz sənayesində yaradılmış əlavə dəyər isə 1,5 dəfə artıb.
Bunu Sahibkarlar Gününə və “Konstitusiya və Suverenlik İli”nə həsr olunan “Konstitusiya və Suverenlik”: Azərbaycanda sahibkarlığın inkişafı” mövzusunda konfransda çıxış edərkən iqtisadiyyat nazirinin birinci müavini Elnur Əliyev deyib.
Elnur Əliyevin sözlərinə görə, 2025-ci ilin yanvar-mart aylarında sənaye müəssisələri və bu sahədə fəaliyyət göstərən fərdi sahibkarlar tərəfindən 15,8 milyard manatlıq sənaye məhsulu istehsal edilib. Qeyri-neft-qaz sektorunda məhsul istehsalı 3,5 faiz artıb.
“Azərbaycanın strateji valyuta ehtiyatları 73 milyard ABŞ dollarını ötüb. Yüksək valyuta ehtiyatları ölkənin iqtisadi sabitliyini göstərir və bu da yerli və xarici investorlar üçün cəlbedici mühit yaradır. Özəl sektorun ÜDM-də payı 83 faiz, məşğulluqda isə 78 faizdən artıqdır”, – Elnur Əliyev qeyd edib.
