Uyğunluğu qiymətləndirən 78 qurum akkreditasiya edilib
Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Akkreditasiya Mərkəzi tərəfindən 2025-ci ilin yanvar-may ayları ərzində uyğunluğu qiymətləndirən 78 qurum akkreditasiya edilib.
Akkreditasiya aparılan qurumlar üzrə göstəricilər:
- Sınaq laboratoriyaları – 34
- İnspeksiya xidməti göstərən orqanlar – 28
- Sınaq (kalibrləmə) laboratoriyaları – 7
- Malın (xidmətin, işin) sertifikatlaşdırılmasını aparan qurumlar – 4
- İdarəetmə sisteminin sertifikatlaşdırılmasını aparan qurumlar – 3
- İşçi heyətinin sertifikatlaşdırılmasını yerinə yetirən qurumlar – 2
Uyğunluğun qiymətləndirilməsi sahəsində həyata keçirilən akkreditasiya prosesi dəqiq nəticələrə malik sınaqların, inspeksiya, ölçmə və kalibrləmə xidmətlərinin əldə olunmasını təmin etməklə yanaşı, istehlakçıların keyfiyyətli və təhlükəsiz mal və xidmətlərə çıxış imkanlarını artırır.
