İnnovativ həllər

“FLEX” Məhdud Məsuliyyətli Cəmiyyəti Azərbaycanda informasiya texnologiyaları sahəsi üzrə fəaliyyət göstərən ən etibarlı biznes şirkətlərindəndir. Sifarişlərin ən optimal müddətdə keyfiyyətli şəkildə həyata keçirilməsi, müştərilərə qarşı loyal münasibət, sərfəli qiymət siyasətinin aparılması bu şirkətin fəaliyyət istiqamətinin ən əsas ana xətləridir. “FLEX” MMC-nin icraçı direktoru Azər Süleymanov şirkətin fəaliyyəti ilə bağlı suallarımızı daha ətraflı şəkildə cavablandırıb.

• Azər bəy, “FLEX” MMC şirkəti müştərilərinə hansı xidmətləri göstərir?

Azərbaycan qanunvericiliyinə uyğun olaraq təsis edilmiş “FLEX” MMC şirkəti 2019-cu ildən etibarən öz müştərilərinə informasiya texnologiyaları (İT), təhlükəsizlik və telekommunikasiya sahələri üzrə xidmət göstərməyə başlayıb. Əsas fəaliyyət istiqamətimiz informasiya texnologiyaları, eləcə də təhlükəsizlik avadanlıqlarının satışı, quraşdırılması və texniki dəstək göstərilməsi, veb səhifələrin, biznes idarəetmə sistemlərinin, müxtəlif proqram təminatlarının qurulması, tətbiqi və texniki dəstək xidmətinin göstərilməsidir. Biz həm də elektron sənəd dövriyyəsi sistemi (ESDS), elektron arxiv idarəetmə sistemi (EAİS) üzrə də xidmətlər göstəririk. Sızma testlərinin keçirilməsi – PENTEST, İT və ya help desk dəstəyi – “outsource” olaraq, hər hansı bir müəssisədə artıq mövcud olan İT, təhlükəsizlik və telekommunikasiya sistemləri avadanlıqları üzrə də servis xidmətinin həyata keçirilməsi fəaliyyət istiqamətlərimizdən biridir. Müştərilərimiz arasında İSR Plaza, “Bio Gold Tarım” şirkəti, “Face Holding”, Mərakeş krallığı, Səudiyyə Ərəbistanı, Sudan və eləcə də Belçika krallığının Azərbaycandakı səfirlikləri, “Sky Dent” Hospital, “DaVinçi” hospital, “Ustay”, “İnşaat MS” MMC, CCN İnşaat, “NortVest Konstrakşn”, “İSTEK Group” havalandırma və servis xidmətləri şirkəti, “Z&Z Motors”, “Çinar Trans” və “Turan Trans” nəqliyyat şirkətləri, “Millenium Dondurma” və “Yedoy” kimi müəssisələr, eləcə də yüzlərlə xırda digər sahibkarlıq subyektləri mövcuddur.

• İndiyədək hansı uğurlu layihələrə imza atmısınız?

Qısa bir vaxt ərzində fəaliyyətə başlamağımıza baxmayaraq, şirkətimiz bu sahədə bir sıra uğurlu layihələrə imza atıb. Hətta deyərdim ki, az əvvəl qeyd etdiyim bütün müştərilərimizin bizə həvalə etmiş olduğu layihələrin hamısı uğurla başa çatdırılmışdır. Gördüyümüz işin də keyfiyyəti çox yüksək qiymətləndirilir. Sualınıza cavab olaraq indiyədək uğurlu hesab etdiyim və ən iri həcmli olanları qeyd etmək istərdim ki, bura Neftçala Sənaye Məhəlləsində, Sabirabad Sənaye Məhəlləsində, “R-Pharm” şirkətində, Heydər Əliyev adına Bakı Neft Emalı zavodunda, “İSR-Plaza”da, Bakının Suraxanı rayonunun 87 saylı orta məktəbində informasiya texnologiyaları üzrə icra olunan layihələri daxil edə bilərəm.

• Göstərdiyiniz xidmətlərlə bağlı ən son tətbiq etdiyiniz yeniliklər hansılardır?

Mövcud sistemlərin avtomatlaşdırılması və “ağıllı sistem”lərin qurulması ilə rahat idarə oluna bilən yeni nəsil (hətta süni intellektə malik olan) sistemlərin qurulması ən son tətbiq etdiyimiz yeniliklər sırasındadır. Artıq iki ilə yaxındır ki, fəaliyyətimizdə bu tip sistemləri uğurla tətbiq edir və daim yeniliklərlə inkişaf etdirməyə çalışırıq. Bu tip sistemlərin üstünlükləri bütün sistemin bir mərkəzdən, eləcə də obyektlərə gəlmədən uzaq məsafədən həm vaxta qənaət edərək, həm də az sayda insan resursu iş prossesinə cəlb edərək asanlıqla idarə olunmasını təmin edilə bilməsidir.

• Dünya bazarında rəqabət apara bilən bir şirkətə çevrilməyi qarşınıza məqsəd qoymusunuz?

Təəssüf ki, mövcud Azərbaycan bazarı hal-hazırda çox da geniş deyil. Bu səbəbdən də müasir dövrdə ölkəmizdə gedən innovativ reformasiya islahatlarını çox yaxından izləməyə çalışan “FLEX” MMC Azərbaycanın qədəm qoyduğu bu inkişaf proseslərinə öz töhfəsini verməklə yanaşı, gələcəkdə dünya bazarına meydan oxuya biləcək bir şirkətə çevrilməyi də özünə hədəf seçib. Bu məqsədlərə çatmaqdan ötrü sözü gedən sahələrdə artıq öz sözünü demiş qabaqcıl dünya şirkətlərinin bilik və bacarıqlarından, onların uzun illər ərzində əldə etdikləri təcrübələrdən yararlanmağa çalışırıq. Bu məqsədlə bir sıra əcnəbi şirkətlərlə əməkdaşlıq edirik.

• İlkin olaraq, hansı ölkələrin bazarlarına daxil olmağı planlaşdırırsınız?

Hər şeydən öncə təbii ki, bir Azərbaycanlı olaraq işğaldan azad olunmuş Qarabağımızda xüsusi ilə öz imzamızı atmağı, orada aparılan yenidənqurma işlərində yaxından iştirak etməyi planlaşdırırıq. Bunun üçün artıq tərəfimizdən müəyyən addımlar atılmışdır. Növbəti il üçün biz ilk növbədə Mərkəzi Asiya ölkələri olan Özbəkistan, Qırğızıstan və bazar imkanları çox geniş olan Rusiya bazarına daxil olmaq niyyətindəyik. Belə ki, gələn il ərzində artıq danışıqlara başladığımız Özbəkistan və Qırğızıstan şirkətləri ilə əməkdaşlıq quraraq bu bazara daxil olmağı düşünürük.

• Sistemlərin quraşdırılması üçün tələb olunan avadanlıqları haradan əldə edirsiniz?

Bu avadanlıqların çoxu Azərbaycanda istehsal edilmədiyindən onları xarici bazarlardan alırıq. Əsasən də Türkiyə, ABŞ, Avropa İttifaqı ölkələri, Çin və Birləşmiş Ərəb Əmirliyindən müxtəlif növ mal və avadanlıqlar və eləcə də proqram təminatları idxal edirik. Daha çox keçidə nəzarət (baryer, turniket) və ağıllı ev sistemləri Türkiyədən, kamera-müşahidə və şəbəkə avadanlıqlarını Birləşmiş Ərəb Əmirliyindən, “access control” sistemlərini isə Çindən alırıq, proqram təminatları və xüsusi server və şəbəkə avadanlıqlarını ABŞ və Avropa ölkələrindən idxal edirik.

• Sifarişlərinizi hansı müddətdə yerinə yetirirsiniz?

Əsasən icra olunacaq layihələr üçün müddətləri sifarişçi şirkətlər müəyyən edir. Lakin bizim komandamızın peşəkarlığı adətən bu layihələri vaxtından da əvvəl görməyə imkan verir.

• Hədəfiniz nədir?

Fərdi yanaşma əsasında hər bir müştəriyə individual yanaşaraq çevik və yüksək keyfiyyətli xidmət təqdim etməklə müştəri məmnuniyyətini təmin etməyi özümüz üçün əsas məqsəd kimi müəyyən etmişik. Bizim əsas hədəfimiz hal-hazırda xaricdən idxal etdiyimiz malları Azərbaycanda istehsal etmək və onları “Made in Azerbaijan” brendi adı altında dünya bazarına çıxarmaqdır. Düşünürük ki, yerli istehsalın təşkili xidmətlərin maya dəyərinin ucuzlaşmasına da gətirib çıxaracaqdır.

Xəyyam GÜNƏŞLİ