Təbrizin məşhur “Dalğa” qrupu Bakıda konsert proqramı ilə çıxış edib
Dekabrın 4-ü Heydər Əliyev Sarayında Təbrizin məşhur “Dalğa” musiqi qrupunun konserti keçirilib.
“Dalğa” Cənubi Azərbaycanın Təbriz şəhərində fəaliyyət göstərən tanınmış aşıq qrupudu. Repertuarlarında Azərbaycan xalq və aşıq mahnıları xüsusi yer tutur. 1990-cı ildə, Təbriz şəhərində aşıq Çingiz Mehdipur tərəfindən təsis edilib.Dünyanın 30-dan artıq ölkəsində Azərbaycan aşıq sənətinin təbliği yönümlü geniş konsert proqramı ilə çıxış edib. Bakıda rupun dəfələrlə konsertləri olub.
“Təbrizin səsi” adlandırılan gecədə tamaşaçılarla yanaşı, Milli Məclisin üzvləri, elm adamları, şairlər və yazıçılar iştirak ediblər. Akademik Nizami Cəfərov, professor Misir Mərdanov, deputat Sabir Rüstəmxanlı çıxış edərək aşıq musiqisinin fəlsəfəsindən söz açıblar.
Bu dəfəki konsert proqramında güneyli-quzeyli sənətçilər bir araya gələrək aşıq musiqisini sevənlərə əsl bayram ovqatı yaşadıblar. Güneyli Aşıq Cavad Məhərrəmi, Aşıq Məhbub Əbdu, Aşıq Salar Mehdipur, Aşıq Xatirə Məhəmmədxanlı, Vadud Muazzin səhnəyə çıxıblar.
Quzeyli aşıq Əli Zeynalabdinov, Məhsəti Cabbarova, Mirələm Mirələmov, Anar Şuşalı və digər sənətçilər konsertdə Çingiz Mehdipurun bəstələrini ifa ediblər. Çingiz Mehdipurun tarda “Yanıq kərəm”in solo ifası hamının zövgünə oxşayıb. Köhnə, sevilən ifaları ilə yanaşı konsertdə tamaşaçılara yeni mahnılar təqdim olunub. Konsert böyük anşlaqla keçib.
Günel Həsənova
