SİF “Sənaye və yaşıl layihələrə dəstək” müsabiqəsini elan edib”

Sahibkarlığın İnkişafı Fondu sənaye, o cümlədən kənd təsərrüfatı məhsullarının emalı sahələrində fəaliyyət göstərən, eləcə də yaşıl layihələr həyata keçirən sahibkarlara güzəştli kreditlərin verilməsinin stimullaşdırılması məqsədilə müvəkkil kredit təşkilatlarının nümayəndələri arasında yenidən “Sənaye və yaşıl layihələrə dəstək” adlı müsabiqə keçirir.

Fondun məlumatına görə, müsabiqədə yalnız Fondla əməkdaşlıq edən və 2024-cü il üzrə limiti olan müvəkkil kredit təşkilatlarının (banklar, bank olmayan kredit təşkilatları, kredit ittifaqlarının) kredit mütəxəssisləri iştirak edə bilər.

Qaliblər müsabiqə üzrə bildirilən meyarlar üzrə hesablanan əmsallar nəzərə alınmaqla müəyyənləşdiriləcək. Müsabiqəyə müraciətlərin qəbulu 20 dekabr 2024-cü il tarixinədək davam edəcək.

Qeyd edək ki, ilk “Sənaye və yaşıl layihələrə dəstək” müsabiqəsi çərçivəsində Fondun müvəkkil kredit təşkilatlarının kredit mütəxəssisləri tərəfindən 136 layihəyə ümumilikdə 27 milyon manata yaxın güzəştli kredit ayrılıb.