Ruanda səfiri AZPROMO-da olub

Görüşdə iki ölkə arasında iqtisadi əlaqələrin möhkəmləndirilməsi, ticarət sahəsində əməkdaşlıq müzakirə olunub.

İxracın və İnvestisiyaların Təşviqi Agentliyində – AZPROMO-da Ruandanın Azərbaycandakı fövqəladə və səlahiyyətli səfiri Çarlz Kayonqa ilə görüş keçirilib. Görüş zamanı AZPROMO-nun icraçı direktorunun müavini Tural Hacılı Agentliyin fəaliyyət istiqamətləri barədə məlumat verib. Səfir Çarlz Kayonqa ölkəsinin Azərbaycanın beynəlxalq tədbirlərin təşkili üzrə zəngin təcrübəsini öyrənməkdə maraqlı olduğunu bildirib. Əlavə edilib ki, xarici ölkələrdə keçirilən tədbirlər üzrə məlumat mübadiləsinin aparılması və bu platformaların ölkələrimizin işgüzar dairələri arasında təmasların artırılması üçün istifadə etmək olar.

Ardınca tərəflər arasında qarşılıqlı ticarət, mədənçilik və turizm sahələrində tərəfdaşlıq və investisiya imkanlarına dair fikir mübadiləsi aparılıb, həmçinin ixrac potensialına malik məhsulların potensial tədarükü müzakirə olunub. Bununla yanaşı, Azərbaycanın Asiya ilə Avropanı birləşdirən strateji mərkəz kimi mövqeyinin Ruandanın ixrac imkanlarının və digər bazarlara çıxışının genişləndirilməsində əhəmiyyətli rol oynaya biləcəyi vurğulanıb.