“Azerconnect Group” beynəlxalq mükafatlara layiq görülüb
Azərbaycanın aparıcı İKT şirkəti “Azerconnect Group” üç kateqoriya üzrə beynəlxalq “Stevie” mükafatına layiq görülüb. Göstərilən xidmətlərin keyfiyyətini daha da yüksəltmək məqsədilə həyata keçirilən “Müştərimizi Tanıyaq” layihəsi qızıl “Stevie” mükafatı qazanıb. Bu innovativ təşəbbüs “Azerconnect Group”un əməkdaşlarına müştərilərin ehtiyac və gözləntilərini dərindən anlamağa, bu istiqamətdə yeni yanaşmalar tətbiq etməyə imkan verir.
Bundan əlavə, şirkətə yeni qəbul olunan əməkdaşlar üçün reallaşdırılan “Yeni əməkdaşlar klubu” layihəsi bürünc mükafata layiq görülüb. Eyni zamanda, “Azerconnect Group”un İnsan resursları üzrə baş müdiri Mətanət Babayeva “İnsan resursları üzrə ilin baş müdiri” nominasiyasında gümüş “Stevie” mükafatı qazanıb.
“Azerconnect Group” çevik iş şəraiti, peşəkar inkişaf, karyera imkanları, inklüziv iş mühiti və digər proqramlar ilə davamlı olaraq əməkdaşlarının inkişafına töhfə verir. Şirkət ardıcıl iki dəfə “Top Employers Institute” tərəfindən “Ən yaxşı işəgötürən” mükafatına layiq görülən yeganə yerli şirkətdir. “Azerconnect Group”, həmçinin beynəlxalq audit şirkəti “Deloitte” tərəfindən təsis olunmuş “Best Managed Companies Azerbaijan 2024” müsabiqəsinin də qalibi seçilib.
Qeyd edək ki, bu il insan resursları sahəsində Ən yaxşı işəgötürənlər üçün “Stevie” (Stevie Awards for Great Employers) beynəlxalq biznes müsabiqəsinə müxtəlif kateqoriya üzrə 35 ölkədən 1000-dən çox layihə təqdim olunub. Qaliblər müxtəlif ölkələrdən olan 100-dən çox beynəlxalq ekspertin rəyləri əsasında seçilib. “Stevie Awards for Great Employers” beynəlxalq biznes müsabiqəsinin məqsədi dünyanın ən yaxşı işəgötürənləri tanıdılmasıdır.
Ölkəmizdə dinamik şəkildə inkişaf edən İKT və yüksək texnologiyalar sahələrində fəaliyyət göstərən “Azerconnect Group” mobil, internet, beynəlxalq kanalların təşkili və FinTech, AdTech, Media/TV kimi rəqəmsal xidmətlər təqdim edir. “Azerconnect Group” müxtəlif ölkələrdə enerji, telekommunikasiya, yüksək texnologiyalar və tikinti sahələrində fəaliyyət göstərən “NEQSOL Holding” beynəlxalq şirkətlər qrupunun tərkibinə daxildir.
