Mehdiabad qəsəbəsində yeni yanacaqdoldurma stansiyası istifadəyə verilib

SOCAR brendli növbəti yanacaqdoldurma stansiyası (YDS) istifadəyə verilib.

Binəqədi rayonu, Mehdiabad qəsəbəsi ərazisində yerləşən yanacaqdoldurma stansiyasının açılış mərasimində “SOCAR PETROLEUM” QSC-nin nümayəndələri  iştirak ediblər. Tədbirdə xüsusən son illər dinamik sürətlə görülən işlərdən və qarşıda duran hədəflərdən danışılıb, həmçinin kollektivə yeni qoşulan əməkdaşlara fəaliyyətlərində uğurlar arzu olunub. 

Qeyd edək ki, ölkəmizdə məşğulluq səviyyəsinin artırılması və əhalinin sosial rifahının yaxşılaşdırılması siyasətinə uyğun olaraq, yanacaqdoldurma stansiyasının açılması ilə bərabər, 29 yeni iş yeri də yaradılıb.

Sürücülərin ən çox istifadə etdiyi yollardan biri, Binəqədi – Balaxanı yolunda fəaliyyətə başlayan yeni YDS-də 6 yanacaqpaylayıcı kalonka quraşdırılıb. Burada “Aİ-92”, “Aİ-95” Premium, “Dizel” və LPG markalı yanacaq məhsullarının satışı həyata keçirilir. Eyni zamanda, elektormobillər də nəzərə alınaraq, enerji doldurma məntəqəsi də istismara verilib. YDS nağdsız satış üçün POS-terminallar ilə təchiz edilib.

Xatırladaq ki, hazırda fəaliyyətə başlayan YDS-lə birlikdə ölkə ərazisində “SOCAR” brendli 66 yanacaqdoldurma stansiyası və 13 neft bazası sahəsi fəaliyyət göstərir ki, onlardan 9-u işğaldan azad edilən Qarabağ və Şərqi Zəngəzur iqtisadi rayonlarında yerləşir.